Timothy Lugembe,
Mwanakwetusports.
Katika soka la Tanzania, bonus zimekuwa sehemu ya hamasa kwa wachezaji kuelekea michezo ya kimaamuzi, Kuanzia timu za taifa hadi ngazi ya vilabu, ahadi za fedha zimekuwa zikitumika kuongeza morali na kuhamasisha wachezaji kupambana kutafuta matokeo.
Simba na Yanga ni miongoni mwa vilabu vinavyoweka utaratibu huo katika baadhi ya michezo, hasa pale ushindi unapokuwa na umuhimu katika safari ya timu kwenye mashindano. Kwa upande wa timu za madaraja mengine, bonus pia hujitokeza wakati matokeo yanapohitajika zaidi.
Utaratibu huu una faida zake, kwani ahadi ya malipo ya ziada inaweza kuongeza hamasa kwa wachezaji na kuwafanya waongeze juhudi ndani ya dimba, hata hivyo, swali la msingi ni kama hamasa hiyo inaweza kudumu pale ambapo hakuna bonus iliyowekwa.
Iwapo wachezaji watazoea kuahidiwa fedha kila wanapokabiliwa na mchezo wa maamuzi, kutokuwepo kwa ahadi hiyo kunaweza kuathiri matarajio yao. Hali hiyo inaweza kuibua utegemezi wa motisha ya kifedha, ingawa si kila mchezaji hupunguza juhudi zake kwa sababu ya kukosekana kwa bonus.
Ndiyo maana viongozi wa timu wanapaswa kuweka uwiano kati ya bonus na wajibu wa wachezaji, Motisha ya kifedha inaweza kuwa nyenzo ya kuongeza hamasa, lakini haipaswi kuwa sababu pekee inayowafanya wachezaji wapambane kutafuta ushindi.
Kwa timu za taifa, suala hili lina umuhimu mkubwa zaidi katika michezo ya kimataifa, ambako matokeo yanaweza kuamua nafasi ya Tanzania katika mashindano, Bonus zinaweza kuongeza hamasa, lakini mafanikio yanahitaji pia maandalizi mazuri, nidhamu, mbinu sahihi na kujituma kwa wachezaji.
Kwa hiyo, bonus zinapaswa kuendelea kuwa sehemu ya mfumo wa motisha pale zinapowezekana, huku timu zikijenga utamaduni wa ushindani usiotegemea ahadi za fedha pekee.
Mwisho wa siku, swali si kama bonus zina nafasi katika soka la Tanzania, bali ni namna zinavyoweza kutumika kuongeza hamasa bila kuwafanya wachezaji waone kuwa kila mchezo muhimu lazima uambatane na ahadi ya malipo ya ziada.
0767915473,
lugembetimothy01@gmail.com.
Post a Comment