Rashid Msiri
Mwanakwetu Blog,
Kwa miaka mingi, mataifa ya Afrika yalionekana kama washiriki wa kawaida katika Kombe la Dunia. Walikuja na vipaji, walitoa burudani, lakini mara nyingi waliishia njiani kabla ya kufikia hatua za mwisho. Hata hivyo, kadri miaka ilivyopita, Afrika imeanza kubadilisha simulizi yake mbele ya dunia ya soka.
Safari ya Morocco kwenye Kombe la Dunia 2022 nchini Qatar ilikuwa ujumbe mkubwa kwa dunia. Kwa mara ya kwanza katika historia, timu kutoka Afrika ilifika hatua ya nusu fainali ya World Cup. Haikuwa bahati, wala miujiza ya siku moja. Ilikuwa ni matokeo ya maandalizi, nidhamu, mfumo mzuri na kuamini kuwa wanaweza kushindana na mataifa makubwa duniani.
Lakini kabla ya Morocco, Afrika tayari ilikuwa imeanza kuandika historia zake taratibu. Cameroon mwaka 1990 waliishtua dunia kwa kuifikia robo fainali huku Roger Milla akiwa moja ya sura zilizotikisa mashindano hayo. Senegal mwaka 2002 waliifunga France kwenye mchezo wa ufunguzi na kufika robo fainali katika ushiriki wao wa kwanza kabisa. Ghana mwaka 2010 waliinua matumaini ya bara lote kabla ya kuangushwa kwa maumivu makubwa dhidi ya Uruguay.
Kila kizazi cha timu hizi kilikuwa kama hatua ya kuisogeza Afrika karibu na ndoto yake kubwa.
Leo hii, tofauti kubwa ni kwamba Afrika haitegemei tena vipaji pekee. Mataifa mengi yanaanza kuwekeza katika academies, miundombinu, sayansi ya michezo na mifumo ya maendeleo ya vijana. Wachezaji wengi wa Afrika wanacheza katika vilabu vikubwa duniani, jambo linalowapa uzoefu mkubwa wa mashindano ya kiwango cha juu.
Pia, kupanuliwa kwa Kombe la Dunia hadi timu 48 kunatoa nafasi kubwa zaidi kwa Afrika kuonyesha nguvu yake. Bara hili sasa litakuwa na nafasi 9 hadi 10, kitu kinachoongeza uwezekano wa timu nyingi za Afrika kupata uzoefu mkubwa zaidi wa mashindano haya.
Lakini pamoja na matumaini yote hayo, bado kuna changamoto kubwa. Mataifa mengi ya Afrika bado yanakabiliwa na: uongozi usio thabiti wa soka, miundombinu duni, maandalizi hafifu,migogoro ya ndani ya vyama vya soka, kukosa mifumo endelevu ya kukuza vipaji.
Ili Afrika itwae Kombe la Dunia, haitahitaji tu wachezaji wenye vipaji. Itahitaji mfumo kamili wa ushindani, utulivu, maandalizi ya kisasa na mentality ya mabingwa.
Hata hivyo, jambo moja lipo wazi: dunia ya soka imeanza kuamini kuwa Afrika inaweza. Na pengine muhimu zaidi, Waafrika wenyewe wameanza kuamini hivyo pia, Cameroon ilifungua mlango,Senegal ikaongeza matumaini,Ghana ikakaribia ndoto,Morocco ikaivunja historia.
Sasa swali kubwa linalobaki ni: Je, hatua inayofuata itakuwa Afrika kunyanyua Kombe la Dunia?
0754645826
rashidmsiri@gmail.com
Post a Comment